جمالی اور مگسی قبائل بھائی بھائی ہیں، معمولی معاملات افہام و تفہیم سے حل ہونے چاہئیں، میر فیروز خان جمالی

جمالی اور مگسی قبائل بھائی بھائی ہیں، معمولی معاملات افہام و تفہیم سے حل ہونے چاہئیں: میر فیروز خان جمالی

حب (رپورٹ: محمد حنیف جمالی) میر فیروز خان جمالی نے کہا ہے کہ جمالی اور مگسی قبائل ایک دوسرے کے پڑوسی ہی نہیں بلکہ صدیوں پر محیط برادرانہ تعلقات کے حامل ہیں، اس لیے معمولی نوعیت کے معاملات کو باہمی احترام، بردباری اور افہام و تفہیم کے ذریعے حل کیا جانا چاہیے۔

میڈیا سے گفتگو کرتے ہوئے میر فیروز خان جمالی نے نوابزادہ میر نادر علی خان مگسی اور تمام مگسی قبائل کا تہہ دل سے شکریہ ادا کیا کہ انہوں نے سوشل میڈیا پر جمالی اور مگسی قبائل کے درمیان چلنے والی باتوں کا بروقت نوٹس لیا اور معاملے کو خوش اسلوبی سے حل کرانے میں اپنا کردار ادا کیا۔

انہوں نے کہا کہ دونوں قبائل کے درمیان دیرینہ قبائلی اور برادرانہ روابط قائم ہیں۔ جمالی اور مگسی قبائل ایک دوسرے کے پڑوسی بھی ہیں اور بھائی بھی ہیں، اس لیے کسی بھی غلط فہمی کو بات چیت اور باہمی احترام کے ذریعے دور کیا جانا چاہیے۔

میر فیروز خان جمالی کا کہنا تھا کہ قبائل کے درمیان امن، بھائی چارہ، اتحاد اور باہمی احترام ہی معاشرے کی مضبوطی کی بنیاد ہیں۔ انہوں نے امید ظاہر کی کہ مستقبل میں بھی جمالی اور مگسی قبائل رواداری اور بھائی چارے کو برقرار رکھتے ہوئے ہر معاملے کو گفت و شنید کے ذریعے حل کریں گے۔