بلوچستان میں سیکیورٹی فورسز کا آپریشن، 9 دہشتگرد ہلاک

مستونگ: بلوچستان کے ضلع مستونگ کے علاقے کنک وادی میں سیکیورٹی فورسز نے کارروائی کرتے ہوئے 9 دہشتگردوں کو ہلاک کردیا۔

سیکیورٹی ذرائع کے مطابق فتنۃ الخوارج سے وابستہ دہشتگردوں نے کنک وادی میں سیکیورٹی چوکی پر حملے کی کوشش کی، جس پر فورسز نے فوری کارروائی کرتے ہوئے ابتدائی طور پر 2 دہشتگردوں کو ہلاک کردیا۔

ذرائع کا کہنا ہے کہ کارروائی کے دوران کچھ دہشتگرد فرار ہونے کی کوشش کرنے لگے، جن کا سیکیورٹی فورسز نے تعاقب کیا اور مزید 7 دہشتگردوں کو ہلاک کردیا۔ یوں کارروائی میں ہلاک ہونے والے دہشتگردوں کی مجموعی تعداد 9 ہوگئی۔

سیکیورٹی ذرائع کے مطابق ہلاک دہشتگردوں کے قبضے سے 3 موٹرسائیکلیں، اسلحہ اور گولہ بارود بھی برآمد کیا گیا۔

فائرنگ کے تبادلے میں سیکیورٹی فورسز کا ایک اہلکار زخمی ہوا، جسے طبی امداد کے لیے اسپتال منتقل کردیا گیا۔

ذرائع کے مطابق یہ کارروائی آپریشن ردالفتنہ 3 کے تحت جاری انسدادِ دہشتگردی کارروائیوں کا حصہ ہے۔