بلوچستان میں انسانی اسمگلنگ کی کوشش ناکام، خواتین و بچوں سمیت 103 افغان زیرِحراست

شیرانی: بلوچستان کے ضلع شیرانی میں سیکیورٹی فورسز نے انسانی اسمگلنگ کی کوشش ناکام بناتے ہوئے خواتین اور بچوں سمیت 103 افغان باشندوں کو حراست میں لے لیا۔

ذرائع کے مطابق کارروائی دانہ سر بائی پاس کے قریب کی گئی، جہاں حراست میں لیے گئے افغان باشندے مبینہ طور پر انسانی اسمگلروں کے ذریعے پاکستان کے راستے ایران اور پھر یورپ جانے کی کوشش کر رہے تھے۔

سیکیورٹی ذرائع کا کہنا ہے کہ تمام زیرِحراست افراد کو مزید قانونی کارروائی کے لیے متعلقہ پولیس حکام کے حوالے کر دیا گیا ہے۔

ذرائع کے مطابق گزشتہ ایک ہفتے کے دوران بلوچستان میں غیر قانونی طور پر نقل و حرکت کرنے والے افغان باشندوں کی حراست کی مجموعی تعداد 129 تک پہنچ گئی ہے۔

سیکیورٹی فورسز کی جانب سے سرحدی علاقوں میں انسانی اسمگلنگ اور غیر قانونی نقل و حرکت کی روک تھام کے لیے کارروائیاں جاری ہیں۔