وزیراعلیٰ بلوچستان کی ہدایت پر صحافی پر مبینہ تشدد کا مقدمہ درج

کوئٹہ: وزیراعلیٰ بلوچستان کی ہدایت پر صحافی پر مبینہ تشدد کے واقعے کا مقدمہ تھانہ گوالمنڈی میں درج کر لیا گیا۔

ذرائع کے مطابق واقعے کا نوٹس لیتے ہوئے ڈی آئی جی کوئٹہ عمران شوکت اور ایس ایس پی آپریشنز کوئٹہ ضیاء الحق مندوخیل نے متعلقہ حکام کو فوری کارروائی کی ہدایت کی۔

ذرائع کا کہنا ہے کہ وزیراعلیٰ بلوچستان کے احکامات پر وزیراعلیٰ کے اسٹاف آفیسر سید امین نے پولیس حکام کے علاوہ خبر رساں ادارے یو این اے کے بیورو چیف اور صحافی نصیر کاکڑ سے بھی رابطہ کیا۔

پولیس نے مبینہ تشدد کے واقعے میں نامزد ملزم باری کاکڑ کے خلاف تھانہ گوالمنڈی میں مقدمہ درج کر لیا ہے، جبکہ معاملے کی مزید قانونی کارروائی جاری ہے۔

پولیس حکام کے مطابق واقعے کی تحقیقات قانون کے مطابق کی جا رہی ہیں اور مزید پیش رفت تفتیش مکمل ہونے کے بعد سامنے آئے گی۔