افغان مہاجرین کی واپسی میں اداروں کے درمیان رابطہ کاری بہتر بنائی جائے،کمشنر کوئٹہ

کوئٹہ: کمشنر کوئٹہ ڈویژن ذیشان لاشاری کی زیرِ صدارت افغان مہاجرین کی واپسی سے متعلق جائزہ اجلاس منعقد ہوا، جس میں ڈپٹی کمشنر کوئٹہ مہر اللہ بادینی، ڈپٹی کمشنر کوئٹہ ویسٹ منیر احمد درانی، پولیس، ایف آئی اے، اسپیشل برانچ، محکمہ داخلہ اور اقوام متحدہ کے متعلقہ ادارے کے افسران نے شرکت کی۔

اجلاس میں افغان مہاجرین کی واپسی کے عمل، انتظامی اقدامات، اب تک ہونے والی پیش رفت اور درپیش مشکلات کا جائزہ لیا گیا۔ اجلاس کو بریفنگ میں بتایا گیا کہ صوبے بھر سے اب تک تقریباً 8 لاکھ افغان مہاجرین واپس افغانستان جا چکے ہیں۔

بریفنگ کے مطابق کوئٹہ شہر سے 3 لاکھ 50 ہزار سے زائد افغان مہاجرین رضاکارانہ واپسی یا انتظامی کارروائیوں کے نتیجے میں افغانستان جا چکے ہیں، جبکہ اس وقت شہر میں تقریباً 23 ہزار افغان مہاجرین موجود ہیں۔

اجلاس میں بتایا گیا کہ باقی افغان مہاجرین کی واپسی کے لیے ضلعی انتظامیہ، پولیس اور ایف آئی اے کی مشترکہ کارروائیاں جاری ہیں۔ کمشنر ذیشان لاشاری نے واپسی کے عمل کو مؤثر بنانے کے لیے متعلقہ اداروں کے درمیان رابطہ کاری مزید بہتر بنانے کی ہدایت کی۔

اجلاس میں پاکستان سے واپس افغانستان جانے کے بعد دوبارہ ملک میں داخل ہونے والے افغان مہاجرین کے معاملے پر بھی غور کیا گیا۔ اس حوالے سے محکمہ داخلہ سے ضروری ہدایات لینے کا فیصلہ کیا گیا، جبکہ دوبارہ آمد کی صورت میں قانون اور حکومتی پالیسی کے مطابق کارروائی کی جائے گی۔

کمشنر ذیشان لاشاری نے متعلقہ اداروں کو حکومتی احکامات اور پالیسی کے مطابق کارروائیاں جاری رکھنے کی ہدایت کی۔