اڈیالہ جیل کے اطراف نیا سیکیورٹی پلان نافذ، سیکڑوں اہلکاروں کی تعیناتی

راولپنڈی: اڈیالہ جیل کے اطراف سیکیورٹی مزید سخت کرتے ہوئے نیا سیکیورٹی پلان نافذ کردیا گیا ہے، جو آج سے تاحکمِ ثانی جاری رہے گا۔

ذرائع کے مطابق جیل کے اطراف مزید 6 پولیس ناکے قائم کیے گئے ہیں، جو داہگل، گیٹ ون، گیٹ فائیو، فارماسیوٹیکل فیکٹری اور گورکھپور سمیت مختلف مقامات پر قائم کیے گئے ہیں۔ اس کے علاوہ پرائیویٹ ہاؤسنگ سوسائٹی، چکری اور ٹھلیاں میں بھی پولیس ناکے لگائے گئے ہیں۔

ذرائع کا کہنا ہے کہ اڈیالہ جیل کے اطراف سیکیورٹی کے لیے مجموعی طور پر 435 پولیس اہلکار تعینات کیے جائیں گے، جن میں رائٹ مینجمنٹ، ضلعی پولیس، ایلیٹ فورس اور ڈولفن فورس کے اہلکار شامل ہوں گے۔

نئے پلان کے تحت داہگل سے گورکھپور تک تمام پٹرول پمپس، ہوٹل، دکانیں اور کمرے بند کروائے جائیں گے، جبکہ مختلف مقامات پر قائم پولیس ناکوں کے ذریعے سیکیورٹی انتظامات کی نگرانی کی جائے گی۔

ذرائع کے مطابق سیکیورٹی سپرویژن کی ذمہ داری ایس پی صدر اور انچارج ڈی ایس پی صدر کو سونپی گئی ہے۔