ایران جنگ جیتتے ہی تیل سستا ہوجائے گا، ٹرمپ نے بڑی پیشگوئی کردی

واشنگٹن: امریکی صدر ڈونلڈ ٹرمپ نے دعویٰ کیا ہے کہ ایران کے ساتھ جنگ میں امریکا کی فتح کے بعد عالمی سطح پر تیل کی قیمتوں میں تیزی سے کمی آئے گی۔

ٹرمپ نے سوشل میڈیا پلیٹ فارم ٹروتھ سوشل پر اپنے بیان میں کہا کہ جنگ کے خاتمے کے بعد تیل کی قیمتیں بہت تیزی سے نیچے آئیں گی، جبکہ امریکا میں پٹرول کی قیمت تقریباً 3 ڈالر فی گیلن تک پہنچ سکتی ہے اور بعد ازاں یہ 2 ڈالر فی گیلن سے بھی کم ہونے کا امکان ہے۔

امریکی صدر نے مزید دعویٰ کیا کہ ایران مستقبل میں جوہری ہتھیار حاصل نہیں کر سکے گا۔

ٹرمپ کا یہ بیان ایسے وقت میں سامنے آیا ہے جب ایران کے ساتھ جاری کشیدگی اور آبنائے ہرمز کی صورتحال کے باعث عالمی تیل کی منڈی دباؤ کا شکار ہے۔ حالیہ دنوں میں برینٹ خام تیل کی قیمت تقریباً 98 ڈالر فی بیرل تک پہنچنے کی اطلاعات ہیں۔

ٹرمپ کے مطابق جنگ کے خاتمے کے بعد صورتحال تیزی سے معمول پر آ سکتی ہے، تاہم تیل کی قیمتوں میں کمی کا عملی انحصار عالمی سپلائی، جنگ کے خاتمے اور مارکیٹ کی مجموعی صورتحال پر ہوگا۔