بھاگ شہر میں مسلح افراد کا حملہ، شدید فائرنگ اور دھماکوں کی آوازیں

بھاگ: بلوچستان کے علاقے بھاگ شہر میں صبح سویرے مسلح افراد کی جانب سے حملے کی اطلاعات موصول ہوئی ہیں، جبکہ شہر کے مختلف علاقوں میں شدید فائرنگ اور دھماکوں کی آوازیں بھی سنی گئی ہیں۔

ابتدائی اطلاعات کے مطابق صبح تقریباً 6 بجے بڑی تعداد میں مسلح افراد کے شہر میں داخل ہونے کی اطلاعات سامنے آئی ہیں، جن کی جانب سے مختلف مقامات پر فائرنگ جاری ہے۔

ذرائع کے مطابق مسلح افراد کی جانب سے بھاگ کے ایک پولیس تھانے اور بینک کو بھی نشانہ بنائے جانے کی اطلاعات ہیں۔ فائرنگ کا سلسلہ تاحال جاری ہے، جس کے باعث علاقے میں خوف و ہراس پھیل گیا ہے۔

ابتدائی طور پر کسی جانی نقصان کی اطلاع موصول نہیں ہوئی۔ صورتحال سے متعلق مزید معلومات سامنے آنے پر خبر کو اپ ڈیٹ کیا جائے گا۔