قلات میں سیکیورٹی فورسز اور بھاگ کچھی میں پولیس و اے ٹی ایف کی کامیاب کارروائیاں قابلِ تحسین ہیں، سرفراز بگٹی

کوئٹہ: وزیراعلیٰ بلوچستان میر سرفراز بگٹی نے قلات میں سیکیورٹی فورسز جبکہ بھاگ کچھی میں بلوچستان پولیس اور اے ٹی ایف کی کامیاب کارروائیوں کو سراہتے ہوئے افسران اور جوانوں کو خراجِ تحسین پیش کیا ہے۔

اپنے بیان میں وزیراعلیٰ سرفراز بگٹی نے کہا کہ سیکیورٹی اداروں کی بروقت اور مؤثر کارروائیاں امن دشمن عناصر کے خلاف ریاست کے مضبوط عزم کی عکاس ہیں۔ بلوچستان کے امن کے لیے سیکیورٹی فورسز، پولیس اور اے ٹی ایف کی خدمات اور قربانیاں قابلِ فخر ہیں۔

انہوں نے کہا کہ بلوچستان میں دہشت گرد عناصر امن، ترقی اور خوشحالی کے عمل کو نقصان پہنچانے میں کبھی کامیاب نہیں ہوں گے۔ بھاگ کچھی میں بلوچستان پولیس اور اے ٹی ایف نے ایک بار پھر اپنی پیشہ ورانہ صلاحیتوں کا مؤثر مظاہرہ کیا ہے۔

وزیراعلیٰ بلوچستان کا کہنا تھا کہ دہشت گردی کے خلاف جنگ پوری قوم کی مشترکہ جنگ ہے، جس میں عوام اور ریاستی ادارے متحد ہیں۔ حکومت امن دشمن عناصر کے خلاف زیرو ٹالرنس کی پالیسی پر عمل پیرا ہے اور دہشت گردی کے مکمل خاتمے تک کارروائیاں جاری رہیں گی۔

میر سرفراز بگٹی نے واضح کیا کہ ریاست کی رٹ کو چیلنج کرنے والے عناصر کے ساتھ کوئی رعایت نہیں برتی جائے گی۔ انہوں نے قلات اور بھاگ کچھی کی کارروائیوں میں حصہ لینے والے تمام افسران اور جوانوں کو خراجِ تحسین پیش کیا۔