آئی ایم ایف شرط، جون 2027 تک پیٹرول کی قیمتیں ڈی ریگولیٹ کرنے کا ہدف مقرر

اسلام آباد: حکومت نے پیٹرولیم مصنوعات کی قیمتوں کے موجودہ نظام میں تبدیلی کی تیاری شروع کرتے ہوئے جون 2027 تک پیٹرول کی قیمتیں ڈی ریگولیٹ کرنے کا عبوری ہدف مقرر کرلیا ہے۔

پیٹرولیم پرائسنگ کمیٹی کے اجلاس میں پیٹرولیم مصنوعات کی قیمتوں کے تعین کے طریقہ کار میں اصلاحات پر غور کیا گیا۔ اجلاس میں قیمتوں کے فارمولے کو مارکیٹ سے منسلک کرنے کی تجویز بھی زیرِ غور آئی۔

حکام نے ڈیزل کی قیمتوں میں اچانک اور بڑے اتار چڑھاؤ سے صارفین کو تحفظ دینے کے لیے نئے قواعد و ضوابط وضع کرنے کا فیصلہ کیا۔ اس حوالے سے قیمتوں میں غیر معمولی تبدیلیوں کے اثرات کم کرنے کے لیے طریقہ کار تیار کیا جائے گا۔

اجلاس میں آئی ایف ای ایم کے حساب کے لیے نیا طریقہ کار بھی منظور کرلیا گیا، جس کے تحت پیٹرول کی قیمتوں کو مرحلہ وار مارکیٹ پر مبنی نظام میں منتقل کرنے کی سمت پیش رفت کی جائے گی۔

حکومت کے مطابق قیمتوں کے نظام میں اصلاحات کا مقصد مارکیٹ کے حالات کے مطابق نرخوں کے تعین کو بہتر بنانا اور صارفین کو قیمتوں میں غیر معمولی اتار چڑھاؤ سے ممکنہ حد تک تحفظ فراہم کرنا ہے۔