ایران کے خلاف میرا جنگ کا فیصلہ درست تھا، ٹرمپ

واشنگٹن: امریکی صدر ڈونلڈ ٹرمپ نے ایران کے خلاف جنگ سے متعلق اپنے فیصلے کو درست قرار دیتے ہوئے کہا ہے کہ امریکا اس جنگ میں اپنی برتری ثابت کرچکا ہے۔

ایک انٹرویو میں ٹرمپ نے کہا کہ ایران کے معاملے میں فیصلہ سوچ سمجھ کر کیا گیا تھا اور امریکا جنگ میں کامیابی حاصل کرچکا ہے۔ انہوں نے یوکرین جنگ کے خاتمے کی خواہش کا بھی اظہار کیا۔

مصنوعی ذہانت کے ممکنہ خطرات سے متعلق سوال پر امریکی صدر نے کہا کہ اگر اے آئی انسانیت کے خلاف گئی تو اسے روکنے کے لیے کوئی نہ کوئی راستہ ضرور موجود ہوگا۔

دوسری جانب ٹرمپ نے امریکی فوج کے ہتھیاروں اور گولہ بارود کے ذخائر میں کمی سے متعلق رپورٹس کو مسترد کردیا۔ سوشل میڈیا پر اپنے بیان میں انہوں نے ایسی خبروں کو غلط قرار دیتے ہوئے کہا کہ امریکی فوج کے پاس گولہ بارود کی وافر مقدار موجود ہے۔

ٹرمپ کے مطابق امریکا دفاعی ہتھیاروں کی پیداوار میں بھی مزید تیزی لا رہا ہے۔ بعض امریکی میڈیا رپورٹس میں حالیہ ہفتوں کے دوران ٹوماہاک، پیٹریاٹ اور تھاڈ سمیت بعض اہم دفاعی نظاموں کے ذخائر میں کمی کے خدشات ظاہر کیے گئے تھے۔