مستونگ میں قومی شاہراہ کے مزید دو پل تباہ، آمدورفت متاثر

مستونگ: کوئٹہ–کراچی قومی شاہراہ کے کھڈکوچہ سیکشن میں رابطہ پلوں کو نشانہ بنانے کا سلسلہ جاری ہے، جہاں مزید دو پل دھماکوں کے نتیجے میں تباہ ہوگئے۔
ذرائع کے مطابق منگل کی شام اور رات گئے کھڈکوچہ کے علاقے ریکی بوز کے مقام پر نامعلوم افراد نے قومی شاہراہ پر قائم ایک رابطہ پل کو دھماکے سے اڑا دیا۔ دھماکہ شدید نوعیت کا تھا جس کے باعث قریبی گھروں کی چھتوں کو بھی نقصان پہنچا، تاہم واقعے میں کسی جانی نقصان کی اطلاع نہیں ملی۔
دوسری جانب چوتو مل کے قریب بھی کوئٹہ–کراچی قومی شاہراہ پر ایک رابطہ پل کو دھماکا خیز مواد کے ذریعے تباہ کیا گیا۔
رابطہ پلوں کی مسلسل تباہی کے باعث قومی شاہراہ کے کھڈکوچہ سیکشن میں ٹریفک کا نظام بری طرح متاثر ہوا ہے۔ متعدد پلوں کے ناکارہ ہونے سے شاہراہ کے مختلف حصے شدید متاثر ہوچکے ہیں، جبکہ مسافروں، مال بردار گاڑیوں اور ٹرانسپورٹرز کو آمدورفت میں مشکلات کا سامنا ہے۔
مقامی سطح پر صورتحال کے باعث شاہراہ پر سفر کرنے والوں میں تشویش بھی پائی جاتی ہے