کراچی؛ یومِ آزادی اسٹال پر فائرنگ کرنے والے 3 دہشتگرد گرفتار

کراچی: شہر قائد میں یومِ آزادی کے اسٹال پر فائرنگ کے واقعے میں ملوث تین دہشتگردوں کو گرفتار کرلیا گیا۔

ڈی آئی جی سی ٹی ڈی غلام اظفر مہیسر نے پریس کانفرنس کرتے ہوئے بتایا کہ ڈیفنس فیز ٹو میں یومِ آزادی اسٹال پر فائرنگ کے واقعے میں ملوث ملزمان کو گرفتار کیا گیا ہے۔

انہوں نے بتایا کہ فائرنگ کے واقعے میں 35 سالہ امن ولد جاوید جاں بحق ہوا تھا، جسے مبینہ طور پر اس کی اہلیہ اور بچوں کے سامنے نشانہ بنایا گیا۔

ڈی آئی جی سی ٹی ڈی کے مطابق گرفتار ملزمان کی شناخت ظفر علی، فراز اور سجاد احمد کے نام سے ہوئی ہے، جبکہ ان کے قبضے سے تین ہینڈ گرینیڈ اور پستول بھی برآمد کیے گئے ہیں۔

حکام کے مطابق گرفتار افراد کا تعلق کالعدم ایس آر اے سے ہے اور انہیں مبینہ طور پر بیرون ملک موجود ایک دہشتگرد کی جانب سے یومِ آزادی اسٹال پر حملے کا ٹاسک دیا گیا تھا۔

سی ٹی ڈی حکام کا کہنا ہے کہ واقعے کی مزید تحقیقات جاری ہیں۔