پاکستان تحریک انصاف میں اندرونی اختلافات شدت اختیار کر گئے

پشاور: پاکستان تحریک انصاف میں اندرونی اختلافات کے درمیان خیبرپختونخوا حکومت کی جانب سے سابق وزیراعلیٰ علی امین گنڈاپور کے آبائی ضلع ڈیرہ اسماعیل خان کے ترقیاتی فنڈز روکنے کا معاملہ سامنے آیا ہے۔

نجی ٹی وی کی رپورٹ کے مطابق وزیراعلیٰ خیبرپختونخوا سہیل آفریدی اور سابق وزیراعلیٰ علی امین گنڈاپور کے درمیان گزشتہ کچھ عرصے سے تعلقات کشیدہ ہیں۔ رپورٹ میں یہ بھی دعویٰ کیا گیا ہے کہ علی امین گنڈاپور نے وزیراعلیٰ سہیل آفریدی کا فون نمبر بلاک کر رکھا ہے۔

قومی اسمبلی کے رکن فیصل امین گنڈاپور نے ڈی آئی خان کے ترقیاتی فنڈز روکے جانے کی تصدیق کرتے ہوئے کہا کہ خیبرپختونخوا حکومت کی آخری 43 ارب روپے کی ترقیاتی ریلیز میں ڈی آئی خان کے لیے صرف 8 کروڑ روپے رکھے گئے۔

فیصل امین گنڈاپور کے مطابق ڈی آئی خان میں جاری ترقیاتی منصوبوں پر 50 سے 60 کروڑ روپے سے زائد مالیت کا کام مکمل ہوچکا ہے، تاہم اس کی ادائیگیاں واجبات کی صورت میں موجود ہیں۔

انہوں نے کہا کہ مالی سال 2026-27 کے بجٹ میں ان ترقیاتی منصوبوں کے لیے کوئی رقم مختص نہیں کی گئی اور بجٹ میں ان کا حصہ صفر رکھا گیا ہے۔

فیصل امین گنڈاپور نے مزید بتایا کہ اے ایس ڈی آئی ڈی آئی خان کے لیے بھی رواں مالی سال کوئی بجٹ مختص نہیں کیا گیا، جس کے باعث اس منصوبے کی بجٹ تخصیص بھی صفر ہے۔