لاہور: داماد نے سسرالیوں پر فائرنگ کرکے چار افراد کو قتل کرنے کے بعد خودکشی کرلی

لاہور: صوبائی دارالحکومت کے علاقے چوہنگ میں غیرت اور دیرینہ تنازع پر ایک لرزہ خیز اور خونریز واقعہ پیش آیا ہے، جہاں داماد نے سسرال کے گھر گھس کر بیوی سمیت 4 افراد کو بے دردی سے قتل کرنے کے بعد خود پر بھی گولی چلا کر زندگی کا خاتمہ کر لیا۔

پولیس کے فراہم کردہ ہولناک حقائق کے مطابق، ملزم عمران شوکت نے تقریباً 6 ماہ قبل سمیعہ بی بی سے زبردستی نکاح کیا تھا، لیکن سمیعہ اپنے والدین کے گھر ہی مقیم تھی۔ آج صبح ملزم اپنی بیوی کو زبردستی اپنے ساتھ لے جانے کے لیے سسرال پہنچا۔ انکار اور مزاحمت پر غضبناک ملزم نے پستول نکال کر اندھا دھند فائرنگ کر دی، جس کی زد میں آ کر بیوی سمیعہ بی بی، سسر علی خان، ساس شمائلہ اور 21 سالہ سالہ ذیشان موقع پر ہی دم توڑ گئے۔

سسرالیوں کو خون میں نہلانے کے بعد ملزم عمران شوکت نے اسی پستول سے خود کو بھی گولی مار کر خودکشی کر لی۔ اطلاع ملتے ہی پولیس اور فورنزک ٹیمیں موقع پر پہنچ گئیں اور تمام 5 لاشوں کو پوسٹ مارٹم کے لیے جناح اسپتال منتقل کر کے واقعے کی تفصیلی تحقیقات شروع کر دی ہیں۔