خیبر پختونخوا میں موسلادھار بارشوں کی پیشگوئی، اربن فلڈنگ اور لینڈ سلائیڈنگ کا خدشہ

پشاور: خیبر پختونخوا کے مختلف اضلاع میں آج سے موسلادھار بارشوں کی پیشگوئی کی گئی ہے، جس کے باعث بڑے شہروں کے نشیبی علاقوں میں اربن فلڈنگ جبکہ پہاڑی علاقوں میں لینڈ سلائیڈنگ کا خدشہ ظاہر کیا گیا ہے۔

محکمہ موسمیات کے مطابق بارشوں کا سلسلہ 20 اگست تک جاری رہنے کا امکان ہے۔ اس دوران مردان، صوابی، پشاور اور نوشہرہ کے نشیبی علاقوں میں پانی جمع ہونے کا خطرہ ہے۔

محکمہ موسمیات نے دیر، سوات، کوہستان، مالاکنڈ، شانگلہ، بٹگرام، بونیر، خیبر، باجوڑ، مہمند اور مانسہرہ سمیت مختلف اضلاع میں تیز ہواؤں، گرج چمک کے ساتھ بارش کی پیشگوئی کی ہے۔

ایبٹ آباد، ہری پور، ہنگو، اورکزئی، کرک، کرم اور کوہاٹ میں بھی بارش کا امکان ہے، جبکہ چند مقامات پر موسلادھار بارش ہوسکتی ہے۔ صوبے کے دیگر علاقوں میں موسم گرم اور مرطوب رہنے کی توقع ہے۔