بھارت میں گرفتار ہونے والے افراد کو پاکستان سے جوڑنا پروپیگنڈا ہے، دفتر خارجہ

اسلام آباد: دفتر خارجہ نے بھارت میں ہونے والی بعض گرفتاریوں کو پاکستان سے جوڑنے کے بھارتی الزامات کو مسترد کرتے ہوئے انہیں بے بنیاد قرار دیا ہے۔

ترجمان دفتر خارجہ نے کہا کہ بھارتی الزامات ایک منظم پروپیگنڈا مہم کا حصہ ہیں، جس کا مقصد بھارت کے داخلی سیکیورٹی مسائل سے توجہ ہٹانا اور محدود سیاسی مفادات حاصل کرنا ہے۔

ترجمان نے کہا کہ بھارت پاکستان پر الزام تراشی کے بجائے اپنے اندرونی معاملات پر توجہ دے۔ انہوں نے دعویٰ کیا کہ بھارت ماضی میں بھی پاکستان کے خلاف بے بنیاد الزامات عائد کرتا رہا ہے۔

دفتر خارجہ کا کہنا ہے کہ پاکستان نے عالمی برادری کے سامنے بھارت کی مبینہ تخریبی سرگرمیوں کے شواہد پیش کیے ہیں اور عالمی برادری کو خطے میں امن و استحکام کے لیے حقائق کا جائزہ لینا چاہیے۔