محکمہ آبپاشی کی سرکاری گاڑیوں کی مبینہ سستے داموں نیلامی، اینٹی کرپشن نے مقدمہ درج کرلیا

محکمہ آبپاشی کی سرکاری گاڑیوں کی مبینہ سستے داموں نیلامی، اینٹی کرپشن نے مقدمہ درج کرلیا

کوئٹہ (پ ر) اینٹی کرپشن اسٹیبلشمنٹ بلوچستان نے محکمہ آبپاشی کی قیمتی سرکاری گاڑیوں اور بھاری مشینری کی مبینہ طور پر کم قیمت پر نیلامی اور اس کے نتیجے میں سرکاری خزانے کو ممکنہ بھاری نقصان پہنچنے کے معاملے پر مقدمہ درج کرلیا ہے۔

اینٹی کرپشن حکام کے مطابق کارروائی انکوائری نمبر 28/Q/2025 کے تحت عمل میں لائی گئی۔ مقدمے میں سابق ڈائریکٹر جنرل محکمہ آبپاشی عبدالرزاق خلجی، قائم مقام وہیکل انسپکٹر عبداللطیف، جیولوجسٹ و ڈپٹی ڈائریکٹر طلحہ بگٹی، محکمہ زرعی انجینئرنگ کے ایگریکلچر انجینئر کاشف اللہ خان، ندیم احمد بزئی اور کنٹریکٹر محمد اسحاق کو نامزد کیا گیا ہے۔

اینٹی کرپشن حکام کے مطابق کارروائی کے دوران طلحہ بگٹی کو گرفتار کرلیا گیا ہے جبکہ دیگر نامزد ملزمان کی گرفتاری کے لیے مختلف مقامات پر چھاپے مارے جا رہے ہیں۔

حکام کا کہنا ہے کہ محکمہ آبپاشی کی سرکاری گاڑیوں اور بھاری مشینری کی مبینہ کم قیمت پر نیلامی کے باعث سرکاری خزانے کو پہنچنے والے ممکنہ نقصان سمیت دیگر بے ضابطگیوں کی تحقیقات جاری ہیں۔

اینٹی کرپشن اسٹیبلشمنٹ بلوچستان کے مطابق کیس کی مزید تفتیش قانون کے مطابق جاری ہے اور تحقیقات میں سامنے آنے والے شواہد کی روشنی میں مزید کارروائی عمل میں لائی جائے گی۔

اینٹی کرپشن حکام نے کہا کہ کارروائی حکومت بلوچستان اور وزیراعلیٰ بلوچستان کے کرپشن کے خلاف اقدامات، شفافیت، احتساب اور سرکاری وسائل کے تحفظ کے وژن کے تحت کی جا رہی ہے۔