پورا سسٹم کمپرومائزڈ تھا، دوبارہ مک مکا ہو سکتا ہے، خواجہ آصف نے میر رضا قتل کیس پر سوالات اٹھا دیے

اسلام آباد: وزیر دفاع خواجہ آصف نے میر رضا قتل کیس میں مبینہ کور اَپ پر سوالات اٹھاتے ہوئے کہا ہے کہ معاملے میں سامنے آنے والے حقائق سے ظاہر ہوتا ہے کہ پورا نظام متاثر تھا۔

سماجی رابطے کی ویب سائٹ ایکس پر ایک ٹی وی پروگرام کا ویڈیو کلپ شیئر کرتے ہوئے خواجہ آصف نے کہا کہ میر رضا کیس پر توجہ مرکوز کیے جانے کے نتائج سامنے آ رہے ہیں اور معاملے میں مبینہ کور اَپ کے حقائق بھی سامنے آ رہے ہیں۔

وزیر دفاع کا کہنا تھا کہ اب بھی محتاط رہنا ہوگا، ورنہ جس طرح پہلے مک مکا ہوا تھا، دوبارہ بھی ہو سکتا ہے۔

انہوں نے کہا کہ جن لوگوں نے مبینہ طور پر معاملے کو چھپانے یا کور اَپ کرنے کی کوشش کی، انہیں بھی بے نقاب کرنا ہوگا۔

خواجہ آصف کے بیان کے بعد میر رضا کیس کی تحقیقات، مبینہ کور اَپ اور اس میں ممکنہ طور پر ملوث افراد کے کردار سے متعلق سوالات مزید اہمیت اختیار کر گئے ہیں۔