پیٹرول مہنگا ہے لیکن قلت کہیں آنے نہیں دی، وزیر پیٹرولیم

لاہور: وفاقی وزیرِ پیٹرولیم علی پرویز ملک نے کہا ہے کہ حکومت نے محدود وسائل کے باوجود پیٹرول کی قلت پیدا نہیں ہونے دی، تاہم پیٹرول کی قیمتیں اب بھی زیادہ ہیں۔

ایک تقریب سے خطاب کرتے ہوئے علی پرویز ملک نے کہا کہ حکومت نے عوام کو ریلیف دینے اور تیل کی قیمتوں کو ممکن حد تک کنٹرول رکھنے کی کوشش کی ہے۔ ان کے مطابق خطے کے بعض ممالک میں ایندھن کی فراہمی محدود کی جا رہی ہے، جبکہ پاکستان میں پیٹرول کی دستیابی برقرار رکھی گئی ہے۔

وفاقی وزیر نے بتایا کہ ترکش پیٹرولیم پاکستان کے سمندری حدود میں آف شور ڈرلنگ شروع کرنے جا رہی ہے، جس کے بعد ملک میں بڑی سرمایہ کاری آنے کی توقع ہے۔

انہوں نے کہا کہ ایران امریکا تنازع کے دوران پاکستان نے خطے میں امن اور تحفظ کے لیے اہم کردار ادا کیا، جبکہ مکہ مشترکہ دفاعی معاہدہ پاکستان، سعودی عرب اور ترکیہ کے درمیان تعاون کی اہم پیش رفت ہے۔

علی پرویز ملک کے مطابق پاکستان کی اگلی منزل معاشی میدان میں کامیابیاں حاصل کرنا ہے اور حکومت ملکی معیشت کو مزید مضبوط بنانے کے لیے اقدامات کر رہی ہے۔