پاکستان اور صومالیہ کے درمیان دفاعی تعاون مزید مضبوط بنانے پر اتفاق

راولپنڈی: فیلڈ مارشل سید عاصم منیر سے صومالیہ کے وزیر دفاع سفیر احمد معلم فقی کی قیادت میں اعلیٰ سطح کے وفد نے جنرل ہیڈکوارٹرز (جی ایچ کیو) میں ملاقات کی، جس میں دوطرفہ دفاعی تعاون اور خطے کی سکیورٹی صورتحال پر تفصیلی تبادلہ خیال کیا گیا۔

آئی ایس پی آر کے مطابق ملاقات میں باہمی دلچسپی کے امور، علاقائی سلامتی اور مشترکہ سکیورٹی چیلنجز سے نمٹنے کے لیے تعاون کو مزید فروغ دینے پر اتفاق کیا گیا۔

دونوں جانب سے فوجی روابط، تربیتی تعاون اور سکیورٹی اداروں کی استعداد کار بڑھانے کی اہمیت پر بھی زور دیا گیا، جبکہ مشترکہ چیلنجز سے مؤثر انداز میں نمٹنے کے عزم کا اظہار کیا گیا۔

صومالیہ کے وزیر دفاع نے خطے میں امن و استحکام کے لیے پاکستان کی کوششوں اور پاک افواج کے پیشہ ورانہ کردار کو سراہا۔

اس موقع پر فیلڈ مارشل سید عاصم منیر نے صومالیہ کی سکیورٹی فورسز کی استعداد بڑھانے اور خطے میں پائیدار امن کے لیے پاکستان کے تعاون کا اعادہ کیا۔