ڈاکٹر عبدالمالک بلوچ نے وفاقی حکومت کے سامنے 17 نکات پیش کر دیے

ڈاکٹر عبدالمالک بلوچ نے بلوچستان سے متعلق مختلف سیاسی، آئینی، معاشی اور سماجی امور پر مشتمل 17 نکات وفاقی حکومت کے سامنے پیش کر دیے ہیں۔

پیش کردہ نکات میں بلوچستان کے عوام کو حقِ حاکمیت، ووٹ کے حق کا تحفظ، ساحلی و قدرتی وسائل پر مقامی عوام کے حقوق، نوجوانوں کے لیے روزگار، لاپتہ افراد کے مسئلے کے حل، سیاسی کارکنوں کی رہائی، ڈاکٹر ماہ رنگ اور ان کے ساتھیوں کی رہائی، مسخ شدہ لاشوں کے واقعات کے خاتمے اور طاقت کے استعمال کے بجائے سیاسی و جمہوری طریقے سے مسائل کے حل پر زور دیا گیا ہے۔

انہوں نے بارڈر ٹریڈ کی بحالی، سمندری وسائل پر عوام کے حقوق، آئین پاکستان اور اٹھارویں آئینی ترمیم پر مکمل عمل درآمد، بلوچستان کے طلبہ کے لیے مزید اسکالرشپس، وفاقی اداروں میں صوبے کو آئینی حصہ اور نمائندگی، اشتعال انگیز بیانات سے گریز، مفاہمتی رویوں کے فروغ اور نئے صوبوں کے قیام کی مخالفت پر بھی زور دیا۔

ڈاکٹر عبدالمالک بلوچ کی جانب سے یہ نکات وفاقی حکومت کے سامنے پیش کیے گئے ہیں، جبکہ ان مطالبات پر حکومت کی جانب سے تاحال کوئی باضابطہ ردعمل سامنے نہیں آیا ہے۔