پاکستان سمیت دنیا بھر میں یوم استحصال کشمیر آج منایا جا رہا ہے

اسلام آباد: پاکستان سمیت دنیا بھر میں آج یومِ استحصالِ کشمیر منایا جا رہا ہے۔ اس دن کا مقصد کشمیری عوام سے اظہارِ یکجہتی اور 5 اگست 2019 کو بھارت کی جانب سے مقبوضہ جموں و کشمیر کی خصوصی آئینی حیثیت ختم کرنے کے اقدام کی مذمت کرنا ہے۔

یومِ استحصالِ کشمیر کے موقع پر ملک بھر میں ریلیوں، سیمینارز اور خصوصی تقریبات کا انعقاد کیا جا رہا ہے، جبکہ صبح 9 بجے سائرن بجائے گئے اور ایک منٹ کی خاموشی اختیار کی گئی۔

صدر مملکت آصف علی زرداری نے اپنے پیغام میں کہا کہ جنوبی ایشیا میں پائیدار امن کا انحصار مسئلہ کشمیر کے منصفانہ اور پرامن حل پر ہے، جبکہ پاکستان کشمیری عوام کے حقِ خودارادیت کی حمایت جاری رکھے گا۔

وزیراعظم شہباز شریف نے کہا کہ بھارت مقبوضہ کشمیر میں آبادی کا تناسب تبدیل کرنے، سیاسی آزادیوں کو محدود کرنے اور انسانی حقوق کی خلاف ورزیوں میں ملوث ہے۔ انہوں نے عالمی برادری پر زور دیا کہ وہ مسئلہ کشمیر کے منصفانہ اور دیرپا حل کے لیے مؤثر کردار ادا کرے۔