سوات خود کش حملے کی تحقیقات جاری، حملہ آور کا تعلق دیر سے نکلا

سوات کے علاقے کبل میں پولیس اسٹیشن کے قریب ہونے والے خودکش حملے کی تحقیقات جاری ہیں، جبکہ تحقیقاتی ٹیم نے حملہ آور کی شناخت کے حوالے سے اہم پیش رفت کا دعویٰ کیا ہے۔

تحقیقاتی ذرائع کے مطابق خودکش حملہ آور کا تعلق دیر سے تھا اور وہ ماضی میں بھی دہشت گردی کے واقعات میں ملوث رہا۔ حکام نے حملہ آور کا ریکارڈ حاصل کرلیا ہے جبکہ اس کے سرحد پار روابط کے حوالے سے بھی تحقیقات کی جا رہی ہیں۔

ابتدائی تحقیقات کے مطابق حملہ آور کبل تھانے تک پیدل پہنچا، جہاں دھماکا کیا گیا۔ واقعے میں شہید افراد کی تعداد 17 ہوگئی ہے، جن میں 7 پولیس اہلکار اور 10 شہری شامل ہیں۔

ریسکیو حکام کے مطابق دھماکے کے زخمیوں میں پولیس اہلکار اور شہری شامل ہیں، جنہیں سیدو شریف اسپتال میں طبی امداد فراہم کی جا رہی ہے۔

دوسری جانب واقعے کا مقدمہ کاؤنٹر ٹیررازم ڈیپارٹمنٹ کے تھانے میں دہشت گردی کی دفعات کے تحت درج کرلیا گیا ہے، جبکہ مزید تحقیقات جاری ہیں۔