ایران کے پاس آخری موقع ہے، معاہدہ کرلے ورنہ پچھتائے گا؛ ٹرمپ کی دھمکی

امریکی صدر ڈونلڈ ٹرمپ نے ایران کو خبردار کرتے ہوئے کہا ہے کہ امریکا کے ساتھ معاہدے کا یہ آخری موقع ہے، بصورت دیگر ایران کو سنگین نتائج کا سامنا کرنا پڑ سکتا ہے۔

عالمی میڈیا کے مطابق وائٹ ہاؤس میں صحافیوں سے گفتگو کرتے ہوئے ٹرمپ نے کہا کہ خلیجی ممالک کی درخواست پر ایران کے خلاف ممکنہ فوجی کارروائی مؤخر کی گئی ہے تاکہ سفارت کاری کو ایک اور موقع دیا جا سکے۔

امریکی صدر کا کہنا تھا کہ متعدد ممالک نے رابطہ کرکے ایران کو مذاکرات کا آخری موقع دینے کی درخواست کی، اور اب یہی موقع فراہم کیا جا رہا ہے۔

ٹرمپ نے کہا کہ وہ ایران کو کسی بڑے نقصان سے پہلے معاہدے کا موقع دینا چاہتے ہیں۔ انہوں نے امید ظاہر کی کہ مذاکرات تیزی سے آگے بڑھیں گے اور ابتدائی مرحلے میں آبنائے ہرمز میں بحری آمد و رفت بحال کی جا سکے گی۔

انہوں نے مزید کہا کہ مذاکرات کے اگلے مرحلے میں ایران کے جوہری پروگرام کے معاملے پر پیش رفت کی جائے گی۔

دوسری جانب ایران کا مؤقف ہے کہ مذاکرات امریکا کے ساتھ نہیں بلکہ عمان کے ذریعے جاری ہیں۔