مستونگ حملہ: وزیر داخلہ بلوچستان کی سیشن جج عبدالحکیم کاکڑ اور گن مین کی شہادت کی مذمت

کوئٹہ: صوبائی وزیر داخلہ بلوچستان میر ضیاء اللہ لانگو نے مستونگ میں سیشن جج عبدالحکیم کاکڑ اور ان کے گن مین پر حملے کی شدید مذمت کرتے ہوئے واقعے کو انتہائی افسوسناک اور ناقابلِ برداشت قرار دیا ہے۔

اپنے بیان میں وزیر داخلہ نے آئی جی پولیس بلوچستان اور کمشنر کوئٹہ ڈویژن سے واقعے کی فوری رپورٹ طلب کر لی ہے۔ انہوں نے ہدایت کی کہ حملے کی تمام پہلوؤں سے تحقیقات کی جائیں اور ملزمان کی گرفتاری کے لیے تمام دستیاب وسائل بروئے کار لائے جائیں۔

میر ضیاء اللہ لانگو نے کہا کہ دہشت گردوں کو کسی صورت معاف نہیں کیا جائے گا اور ان کے خلاف سخت کارروائی عمل میں لائی جائے گی۔ انہوں نے کہا کہ امن و امان خراب کرنے والے عناصر کے خلاف ریاست پوری قوت سے کارروائی کر رہی ہے۔

صوبائی وزیر داخلہ کا کہنا تھا کہ عوام کے جان و مال کا تحفظ حکومت کی اولین ترجیح ہے اور دہشت گردی کے خاتمے کے لیے اقدامات مزید مؤثر بنائے جائیں گے۔