امریکا ایران جنگ کے اثرات، عالمی منڈی میں تیل 92 ڈالر فی بیرل سے بھی اوپر پہنچ گیا

لندن: امریکا اور ایران کے درمیان بڑھتی ہوئی فوجی کشیدگی کے اثرات عالمی توانائی مارکیٹ پر نمایاں ہونے لگے ہیں، جہاں خام تیل کی قیمت 92 ڈالر فی بیرل سے بھی اوپر پہنچ گئی ہے۔

رائٹرز کے مطابق برینٹ خام تیل کی قیمت میں 1.1 فیصد اضافہ ہوا، جس کے بعد یہ 92.01 ڈالر فی بیرل تک پہنچ گئی، جبکہ امریکی خام تیل ڈبلیو ٹی آئی بھی اضافے کے بعد 85.16 ڈالر فی بیرل پر ٹریڈ کرتا رہا۔

ماہرین کے مطابق تیل کی قیمتوں میں اضافے کی بڑی وجہ مشرقِ وسطیٰ میں بڑھتی ہوئی کشیدگی اور امریکا و ایران کے درمیان جاری فوجی کارروائیاں ہیں۔

تجزیہ کاروں کا کہنا ہے کہ اگر خطے میں کشیدگی برقرار رہی اور آبنائے ہرمز کے ذریعے تیل کی ترسیل متاثر ہونے کا خدشہ بڑھا تو عالمی منڈی میں تیل کی قیمتوں میں مزید اضافہ ہو سکتا ہے۔