ڈی جی آئی ایس پی آر کی سمر کیمپ 2026 میں شریک طلبہ و طالبات کے ساتھ خصوصی نشست

راولپنڈی: ڈی جی آئی ایس پی آر نے سمر کیمپ 2026 میں شریک طلبہ و طالبات کے ساتھ خصوصی نشست کی، جس میں قومی سلامتی، دہشت گردی اور پاکستان کو درپیش داخلی و بیرونی چیلنجز پر تفصیلی گفتگو کی گئی۔

آئی ایس پی آر کے مطابق سمر کیمپ 2026 میں پاکستان کے 18 سے زائد شہروں سے نویں سے بارہویں جماعت کے 4 ہزار سے زائد طلبہ و طالبات شریک ہیں، جنہیں مختلف تعلیمی اور آگاہی پروگراموں میں شامل کیا جا رہا ہے۔

نشست میں شریک طلبہ و طالبات نے کہا کہ انہیں پاکستان کو درپیش سیکیورٹی چیلنجز کے بارے میں مؤثر آگاہی ملی۔ ان کے مطابق سیشن میں بلوچستان میں سرگرم فتنہ الہندوستان اور فتنہ الخوارج سے متعلق سیکیورٹی خدشات اور دہشت گردی کے حوالے سے بھی بریفنگ دی گئی۔

طلبہ نے اس بات پر زور دیا کہ موجودہ دور میں غلط معلومات اور پروپیگنڈے کے پھیلاؤ کے باعث عوامی آگاہی انتہائی ضروری ہے۔ انہوں نے دہشت گردی کے خلاف قومی یکجہتی کے عزم کا اظہار کرتے ہوئے کہا کہ پوری قوم اس چیلنج سے نمٹنے کے لیے متحد ہے۔

آئی ایس پی آر کے مطابق سمر کیمپ کا مقصد نوجوانوں میں قومی شعور بیدار کرنا، ان کی صلاحیتوں کو اجاگر کرنا اور انہیں قومی امور سے متعلق بہتر آگاہی فراہم کرنا ہے۔