خریف سیزن میں پانی کی منصفانہ تقسیم یقینی بنائی جائے گی، چیف انجینئر کینالز

چیف انجینئر کینالز قربان علی جتوئی نے ایگزیکٹو انجینئر پٹ فیڈر کینال فرید احمد پندرانی اور سب ڈویژنل آفیسر امان اللہ گاجانی کے ہمراہ ڈپٹی کمشنر جعفرآباد خالد خان سے خریف سیزن کے موقع پر ذرعی پانی کے حوالے سے تبادلہ خیال کیا سب ڈویژنل آفیسر سید امجد شاہ بھی موجود تھے۔ ملاقات کے دوران ڈپٹی کمشنر خالد خان نے ضلع جعفرآباد میں زرعی مربوط حکمت عملی کے تحت عوام کو ان کے حصے کا پانی فراہم کے حوالے سے آگاہی فراہم کی اس موقع پر ایگزیکٹو انجینئر پٹ فیڈر کینال فرید احمد پندرانی نے بتایا کہ سندھ سے پانی کی فراہمی میں شارٹ فال کے باعث مشکلات کا سامنا ہے، جبکہ چیف انجینئر کینالز قربان علی جتوئی نے کہا کہ دریائے سندھ میں پانی کی کمی کے اثرات پورے نظام پر مرتب ہوئے ہیں، تاہم دستیاب پانی کی منصفانہ تقسیم کو یقینی بنایا جا رہا ہے۔ انہوں نے کہا کہ پانی چوری کے خلاف بلاامتیاز کارروائیاں جاری ہیں، اوور سائز پائپوں کے ذریعے ٹیل کے کاشتکاروں کا حق غصب کرنے والوں کے خلاف سخت ایکشن لیا جا رہا ہے اور اب تک آٹھ پانی چوروں کے خلاف قانونی کارروائی کی جا چکی ہے۔ انہوں نے مزید کہا کہ ضلع جعفرآباد کی تمام نہریں ٹیل پر واقع ہونے کے باعث پانی کی ترسیل میں مشکلات درپیش ہیں، تاہم محکمہ ایریگیشن عوام اور کاشتکاروں کو ان کے حصے کا پانی پہنچانے کے لیے تمام دستیاب وسائل بروئے کار لا رہا ہے اور پانی کی منصفانہ فراہمی ہر صورت یقینی بنائی جائے گی۔