آپریشن شعبان میں بڑی کامیابی، 39 دہشت گرد ہلاک،وزیراعلیٰ بلوچستان

کوئٹہ: وزیراعلیٰ بلوچستان میر سرفراز بگٹی نے کہا ہے کہ منگی ڈیم حملے کے بعد شروع کیا گیا آپریشن شعبان کامیابی سے جاری ہے، جس کے دوران مشترکہ کارروائیوں میں 39 دہشت گرد مارے گئے ہیں۔

وزیراعلیٰ کے مطابق 5 جولائی سے جاری انٹیلی جنس بیسڈ آپریشنز میں اب تک مجموعی طور پر 75 دہشت گرد ہلاک کیے جا چکے ہیں۔

انہوں نے کہا کہ پاک فوج، ایف سی اور بلوچستان پولیس دشوار گزار علاقوں میں دہشت گردوں کے خلاف بھرپور کارروائیاں جاری رکھے ہوئے ہیں اور ریاستی ادارے امن و امان کے قیام کے لیے پرعزم ہیں۔

میر سرفراز بگٹی نے بتایا کہ خضدار کے علاقے زہری میں پولیس اسٹیشن پر دہشت گرد حملے کی کوشش کو بروقت کارروائی کے ذریعے ناکام بنا دیا گیا۔

وزیراعلیٰ بلوچستان کا کہنا تھا کہ صوبے میں ریاست کی رٹ ہر قیمت پر برقرار رکھی جائے گی، دہشت گرد اپنے انجام سے نہیں بچ سکتے۔