اپوزیشن نے بلوچستان حکومت کا استعفیٰ مانگ لیا

اسلام آباد: تحریک تحفظ آئین پاکستان کے رہنماؤں نے بلوچستان کی موجودہ صورتحال پر وفاقی اور صوبائی حکومت کو شدید تنقید کا نشانہ بناتے ہوئے بلوچستان حکومت سے فوری استعفے کا مطالبہ کیا ہے۔

اسلام آباد میں مشترکہ پریس کانفرنس سے محمود خان اچکزئی، سردار اختر مینگل، راجہ ناصر عباس، لطیف کھوسہ، مصطفیٰ نواز کھوکھر اور دیگر اپوزیشن رہنماؤں نے خطاب کیا۔

اپوزیشن رہنما مصطفیٰ نواز کھوکھر نے کہا کہ بلوچستان حکومت فوری طور پر استعفیٰ دے۔ انہوں نے مطالبہ کیا کہ تمام لاپتہ افراد کو قانون کے مطابق عدالتوں میں پیش کیا جائے اور بلوچستان میں مبینہ طور پر سرگرم مسلح گروہوں اور ڈیتھ اسکواڈز کی سرپرستی ختم کی جائے۔

انہوں نے وزیراعظم کے دورہ کوئٹہ پر تنقید کرتے ہوئے کہا کہ وزیراعظم صرف فوٹو سیشن کے لیے کوئٹہ گئے اور شہداء کے لواحقین و مظاہرین سے ملاقات نہیں کی۔

اپوزیشن لیڈر محمود خان اچکزئی نے سانحہ زیارت کے ذمہ داروں کے استعفے یا فوری برطرفی کا مطالبہ کرتے ہوئے کہا کہ واقعے کی ذمہ داری کا تعین کیا جانا چاہیے۔

بی این پی کے سربراہ سردار اختر مینگل نے کہا کہ اگر بلوچستان کا مسئلہ حل کرنا ہے تو ریاست کو سنجیدگی کا مظاہرہ کرنا ہوگا، کیونکہ سیاسی مسائل کا حل صرف بامعنی سیاسی مذاکرات میں ہے۔