عوامی مسائل کا بروقت اور دیرپا حل یقینی بنائینگے، فیصل جمالی

گنداخہ: (نامہ نگار فریداحمد) پاکستان پیپلز پارٹی کے سینئر رہنما اور صوبائی وزیر لائیو اسٹاک سردارزادہ فیصل خان جمالی سے ان کے دفتر سول سیکرٹریٹ کوئٹہ میں حلقہ انتخاب اوستا محمد، گنداخہ اور گردونواح سے آنے والے مختلف وفود، معززین، سیاسی و سماجی شخصیات اور شہریوں نے ملاقات کی۔ وفود نے اپنے اپنے علاقوں کو درپیش مسائل، ترقیاتی منصوبوں، زرعی پانی، تعلیم، صحت، سڑکوں، بجلی اور دیگر عوامی فلاحی امور سے متعلق تفصیلی طور پر آگاہ کیا۔اس موقع پر صوبائی وزیر سردارزادہ فیصل خان جمالی نے تمام وفود کے مسائل توجہ سے سنے اور متعلقہ حکام کو ان کے حل کے لیے ضروری اقدامات کی ہدایات دیتے ہوئے یقین دہانی کرائی کہ عوام کے مسائل کا بروقت اور دیرپا حل ان کی اولین ترجیح ہے۔ انہوں نے کہا کہ عوام نے جس اعتماد کے ساتھ انہیں اپنی نمائندگی کی ذمہ داری سونپی ہے، وہ اس اعتماد پر ہر صورت پورا اتریں گے اور حلقے کی ترقی، خوشحالی اور بنیادی سہولیات کی فراہمی کے لیے تمام دستیاب وسائل بروئے کار لائے جائیں گے۔انہوں نے کہا کہ ان کا وژن صرف ترقیاتی منصوبے مکمل کرنا نہیں بلکہ عوام کی زندگی میں حقیقی اور مثبت تبدیلی لانا ہے۔ صحت، تعلیم، پینے کے صاف پانی، زرعی شعبے کی بہتری، نوجوانوں کے لیے روزگار کے مواقع اور بنیادی انفراسٹرکچر کی مضبوطی حکومت کی ترجیحات میں شامل ہیں، اور ان شعبوں میں مزید مؤثر اقدامات کیے جائیں گے۔صوبائی وزیر نے مزید کہا کہ عوام کے لیے ان کے دفتر کے دروازے ہمیشہ کھلے ہیں اور ہر شہری بلاجھجھک اپنے مسائل پیش کر سکتا ہے۔ انہوں نے کہا کہ عوامی خدمت کسی احسان کا نام نہیں بلکہ ایک مقدس ذمہ داری ہے، جسے وہ پوری دیانت داری، اخلاص اور عملی اقدامات کے ذریعے نبھا رہے ہیں۔ملاقات کرنے والے وفود نے صوبائی وزیر سردارزادہ فیصل خان جمالی کی عوام دوستی، مسلسل رابطے اور مسائل کے حل میں ذاتی دلچسپی کو سراہتے ہوئے کہا کہ وہ عوامی نمائندے کے طور پر نہ صرف لوگوں کی بات سنتے ہیں بلکہ عملی طور پر مسائل کے حل کے لیے اقدامات بھی کرتے ہیں۔ وفود نے اس امید کا اظہار کیا کہ ان کی قیادت میں حلقہ انتخاب میں ترقیاتی عمل مزید تیز ہوگا اور عوام کو بنیادی سہولیات کی فراہمی میں نمایاں بہتری آئے گی۔