ہنہ اوڑک کے شہداء کی قربانیاں ہمیشہ یاد رکھی جائیں گی، عبدالرحمن رفیق

کوئٹہ: جمعیت علماء اسلام (جے یو آئی) ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینئر نائب امیر مولانا خورشید احمد، سیکرٹری اطلاعات عبدالغنی شہزاد، عبدالصمد حقیار، مفتی محمد ابوبکر، عبدالباری شہزاد، مولانا جمال الدین حقانی، مفتی رشید احمد حقانی اور حاجی عطاء محمد شمشوزئی نے ہنہ اوڑک کے دہشت گرد حملے کی شدید مذمت کرتے ہوئے کہا ہے کہ اگر دہشت گردی کی لہر کو نہ روکا گیا اور عوام کو مستقل امن فراہم نہ کیا گیا تو یہ ملک کے استحکام کے لیے نیک شگون نہیں ہوگا۔

رہنماؤں نے اپنے مشترکہ بیان میں کہا کہ ہنہ اوڑک کے شہداء کی قربانیاں ہمیشہ یاد رکھی جائیں گی۔ انہوں نے افسوس کا اظہار کرتے ہوئے کہا کہ بلوچستان کے عوام پہلے ہی بنیادی سہولیات سے محروم ہیں، جبکہ اب انہیں امن و امان اور جینے کے بنیادی حق سے بھی محروم کیا جا رہا ہے۔

انہوں نے کہا کہ ہنہ اوڑک اور ملحقہ پہاڑی علاقوں میں مسلح گروہوں کی آزادانہ نقل و حرکت اور شہریوں کو ہراساں کیے جانے کے واقعات انتہائی تشویشناک ہیں، جس کے باعث عوام خوف و ہراس اور عدم تحفظ کا شکار ہیں۔

جے یو آئی رہنماؤں نے مطالبہ کیا کہ ریاستی ادارے شہریوں کے جان و مال کے تحفظ کو یقینی بنائیں اور دہشت گرد عناصر کے خلاف بروقت، مؤثر اور فیصلہ کن کارروائی عمل میں لائیں۔

انہوں نے کہا کہ حکمرانوں کی ذمہ داری صرف سانحات کے بعد تعزیت اور ہمدردی تک محدود نہیں بلکہ عوام کے جان، مال، عزت اور بنیادی حقوق کا تحفظ ان کی آئینی، قانونی اور اخلاقی ذمہ داری ہے۔ صرف بیانات سے عوام کے زخموں کا مداوا نہیں ہو سکتا۔

رہنماؤں نے حکومت سے مطالبہ کیا کہ امن و امان کے قیام کے لیے عملی اقدامات کیے جائیں، شہریوں کو مکمل تحفظ فراہم کیا جائے اور بلوچستان میں خوف و عدم تحفظ کی فضا کے خاتمے کے لیے فوری، سنجیدہ اور دیرپا حکمت عملی اختیار کی جائے۔