کان مہترزئی کے مقام پر سینیٹر مولانا عبدالواسع کے اسکواڈ کی گاڑی کو حادثہ، ایک پولیس اہلکار شہید، چار زخمی

قلعہ سیف اللہ: کان مہترزئی کے مقام پر سینیٹر مولانا عبدالواسع کے اسکواڈ میں شامل ایک گاڑی اور ٹرک کے درمیان تصادم کے نتیجے میں ایک پولیس اہلکار شہید جبکہ چار اہلکار زخمی ہوگئے۔

ذرائع کے مطابق حادثہ قومی شاہراہ پر پیش آیا، جہاں اسکواڈ کی گاڑی ٹرک سے ٹکرا گئی۔ تصادم کے باعث گاڑی میں سوار پولیس اہلکار شدید زخمی ہوئے جن میں سے ایک اہلکار زخموں کی تاب نہ لاتے ہوئے شہید ہوگیا۔

ریسکیو ٹیموں اور مقامی انتظامیہ نے فوری طور پر جائے حادثہ پر پہنچ کر زخمیوں کو ابتدائی طبی امداد فراہم کی، جس کے بعد انہیں مزید علاج کے لیے کوئٹہ منتقل کردیا گیا۔

واقعے کے بعد متعلقہ اداروں نے حادثے کی تحقیقات شروع کردی ہیں جبکہ شہید اہلکار کی خدمات کو خراجِ عقیدت پیش کیا جا رہا ہے۔