کوئٹہ میں 7ویں محرم پر موبائل نیٹ ورک معطل، سکیورٹی ہائی الرٹ

کوئٹہ: حکومت بلوچستان نے 7ویں محرم الحرام کے موقع پر امن و امان کی صورتحال برقرار رکھنے اور جلوسوں و مجالس کی سکیورٹی کو یقینی بنانے کے لیے کوئٹہ شہر میں موبائل فون اور انٹرنیٹ سروس رات تک معطل کردی۔ حکام کے مطابق یہ فیصلہ سکیورٹی خدشات کے پیش نظر کیا گیا ہے تاکہ کسی بھی ناخوشگوار واقعے سے بچا جا سکے۔

صوبائی انتظامیہ کے مطابق محرم الحرام کے دوران سکیورٹی کے سخت انتظامات کیے گئے ہیں جبکہ حساس علاقوں میں اضافی نفری تعینات کردی گئی ہے۔ شہریوں سے اپیل کی گئی ہے کہ وہ سکیورٹی اداروں کے ساتھ تعاون کریں اور افواہوں پر کان نہ دھریں۔

ماضی میں بھی محرم الحرام کے دوران کوئٹہ میں موبائل اور انٹرنیٹ سروسز عارضی طور پر معطل کی جاتی رہی ہیں تاکہ امن و امان کی صورتحال کو برقرار رکھا جا سکے۔