کوئٹہ کے ترقیاتی منصوبے عوام کے لیے اذیت بن گئے،مولاناعبدالرحمن رفیق

جمعیت علماء اسلام ضلع کوئٹہ کے امیر شیخ الحدیث مولانا عبدالرحمن رفیق، سیکرٹری جنرل حاجی عین اللہ شمس، سینیئر نائب امیر مولانا خورشید احمد، حاجی بشیر احمد کاکڑ، مولانا محب اللہ، مولانا محمد ایوب ایوبی، شیخ مولانا عبدالاحد، مولانا سعید احمد، حافظ سراج الدین، مفتی محمد روزی خان بادیزئی، مولانا محمد شعیب جدون، رحیم الدین ایڈووکیٹ اور مولانا محمد عارف شمشیر نے کہا ہے کہ صوبائی دارالحکومت کوئٹہ میں جاری نام نہاد ترقیاتی منصوبے عوام کے لیے شدید اذیت اور پریشانی کا باعث بن چکے ہیں۔ شہر کی اہم شاہراہیں ٹوٹ پھوٹ کا شکار ہوکر کھنڈرات کا منظر پیش کررہے ہیں ترقیاتی کاموں میں سست روی نے شہری زندگی کو مفلوج کرکے رکھ دیا ہے۔انہوں نے کہا کہ جگہ جگہ سڑکوں کی کھدائی، ناقص منصوبہ بندی اور کام کی سست رفتاری کے باعث گردوغبار، ماحولیاتی آلودگی اور ٹریفک کے مسائل میں خطرناک حد تک اضافہ ہوچکا ہے جس سے شہری بالخصوص موٹر سائیکل سوار اور پیدل چلنے والے شدید مشکلات اور ذہنی اذیت سے دوچار ہیں۔ آمدورفت میں رکاوٹیں اور روزمرہ زندگی کے معمولات متاثر ہونے سے عوام میں شدید بے چینی پائی جارہی ہے۔ انہوں نے کہا کہ حکومت ایک منصوبے کو مکمل اور فعال بنانے کے بجائے بیک وقت متعدد منصوبوں کا آغاز کرکے شہریوں کو مسلسل مشکلات میں مبتلا کررہی ہے۔ ترقیاتی منصوبوں میں شفافیت، معیار اور بروقت تکمیل کا فقدان حکومتی نااہلی اور بدانتظامی کا واضح ثبوت ہے۔ عوامی سہولت کے نام پر جاری یہ منصوبے درحقیقت مفادات اور کرپشن کے حصول کا ذریعہ بنائے جارہے ہیں عوام کو بنیادی سہولیات سے محروم کرکے ان کی زندگی اجیرن بنادی گئی ہے۔انہوں نے مطالبہ کیا کہ حکومت اور متعلقہ ادارے فوری طور پر ترقیاتی منصوبوں کی رفتار تیز کرکے تمام منصوبوں کو مقررہ مدت میں مکمل کرکے عوام کو درپیش مشکلات کا فوری ازالہ کریں۔

Browse Posts

سکھر اسمال ٹریڈرز کی افواج پاکستان سے اظہارِ تشکر کے لیے ریلی کا انعقاد

سب ڈویژن اولڈ سکھر کے باہر ہائیڈرو یونین مزدوروں کا درد بھرا احتجاج تھکے ہارے محنت کش انصاف کے منتظر

نوید عالم نے بطور ایس ایس پی پشین عہدے کا باقاعدہ چارج سنبھال لیا