بلوچستان دہشت گردی کی زمین نہیں بلکہ امن، ثقافت اور محبت کی سرزمین ہے،وزیر اعلیٰ بلوچستان

بلوچستان حکومت نے صوبے میں فنکاروں کی بہبود کے لیے آرٹسٹ ویلفیئر انڈومنٹ فنڈ کی رقم مرحلہ وار دگنی کرنے کا فیصلہ کیا ہے۔ گریڈ 16 سے کم سرکاری ملازمین آرٹسٹوں کی مالی معاونت اسی فنڈ کے ذریعے جاری رہے گی۔

وزیر اعلیٰ بلوچستان میر سرفراز بگٹی سے آرٹسٹ نمائندہ وفد نے ملاقات کی، جس میں فنکاروں کے مسائل اور فلاحی اقدامات پر تفصیلی تبادلہ خیال کیا گیا۔

وزیر اعلیٰ نے کہا کہ صوبے کے آرٹسٹوں کی فلاح و بہبود کے لیے ٹھوس اور عملی اقدامات جاری رکھے جائیں گے۔ بلوچستان کا ثقافتی ورثہ امن، رواداری اور محبت کا آئینہ دار ہے، اور فنکار اپنے فن کے ذریعے صوبے کا مثبت اور حقیقی تشخص اجاگر کریں۔

انہوں نے مزید کہا کہ بلوچستان دہشت گردی کی زمین نہیں بلکہ امن، ثقافت اور محبت کی سرزمین ہے، اور آرٹسٹ اپنی تخلیقی صلاحیتوں سے صوبے کی تاریخی شناخت کو عالمی سطح پر متعارف کرائیں۔

وزیر اعلیٰ نے یاد دلایا کہ ماضی میں پی ٹی وی کوئٹہ سینٹر کے فنکاروں نے معیاری ڈراموں کے ذریعے بلوچستان کا نام دنیا بھر میں روشن کیا، اور آج بھی ایسے اخلاقی اور معیاری ڈرامے صوبے کے پائیدار ثقافتی تشخص کو اجاگر کرنے میں مؤثر ثابت ہو سکتے ہیں۔

فنکار اس سمت میں کام کریں، حکومت بلوچستان ہر ممکن تعاون اور سرپرستی فراہم کرے گی۔