پارلیمانی سیکرٹری محکمہ جنگلات سردار مسعود لونی کی پرنسپل سیکرٹری ٹو چیف منسٹر عمران زرکون سے ملاقات

پارلیمانی سیکرٹری محکمہ جنگلات سردار مسعود لونی نے اپنے حلقہ انتخاب ضلع دکی میں حالیہ سیلابی صورتحال کے حوالے سے پرنسپل سیکرٹری ٹو چیف منسٹر بلوچستان عمران زرکون سے اہم ملاقات کی، جس میں متاثرہ علاقوں کی مجموعی صورتحال، نقصانات اور فوری درپیش چیلنجز پر تفصیلی تبادلہ خیال کیا گیا سردار مسعود لونی نے ملاقات کے دوران دکی میں بارشوں اور سیلاب کے باعث ہونے والے نقصانات، متاثرہ آبادی کو درپیش مشکلات اور امدادی سرگرمیوں کی ضروریات سے آگاہ کرتے ہوئے فوری حکومتی توجہ اور عملی اقدامات کی ضرورت پر زور دیا پرنسپل سیکرٹری عمران زرکون نے صورتحال کا سنجیدگی سے نوٹس لیتے ہوئے ڈائریکٹر جنرل پی ڈی ایم اے، متعلقہ ڈویژنل اور ضلعی انتظامی افسران کو ہدایت کی کہ وہ سیلاب سے متاثرہ علاقوں میں فوری امدادی و بحالی اقدامات کو یقینی بنائیں، متاثرین کی بروقت مدد، خوراک اور طبی سہولیات کی فراہمی کو ترجیح دی جائے اور کسی بھی قسم کی غفلت برداشت نہیں کی جائے گی انہوں نے ہدایت کی کہ ضلعی انتظامیہ متاثرہ علاقوں کی مسلسل مانیٹرنگ کرے اور ریسکیو و ریلیف آپریشنز کو مؤثر اور مربوط انداز میں جاری رکھا جائے تاکہ عوام کو درپیش مشکلات کا فوری ازالہ ممکن بنایا جا سکے حکومت بلوچستان متاثرہ عوام کو ہر ممکن ریلیف فراہم کرنے اور سیلابی صورتحال سے نمٹنے کیلئے تمام دستیاب وسائل بروئے کار لا رہی ہے۔