سرکاری دفاتر کا مقصد عوام کی خدمت اور سہولیات کی فراہمی ہے،ڈی سی لورالائی حسیب شجاع

ڈپٹی کمشنر لورالائی کیپٹن ریٹائرڈ محمد حسیب شجاع کی زیرِ صدارت عملہ مال، اسسٹنٹ کمشنرز اور تحصیلداروں کا اجلاس منعقد ہوا۔ جس میں تمام متعلقہ افسران نے شرکت کی۔اجلاس سے خطاب کرتے ہوئے ڈپٹی کمشنر نے ہدایت کی کہ عملہ مال اپنے فرائض ایمانداری، ذمہ داری اور خوش اسلوبی سے انجام دے اور عوام کو زیادہ سے زیادہ ریلیف فراہم کرے۔ انہوں نے کہا کہ ریونیو معاملات کو بہتر بنایا جائے تاکہ حکومتی آمدن میں اضافہ ممکن ہو سکے۔ڈپٹی کمشنر نے واضح کیا کہ غیر حاضری اور عوام کے ساتھ بدسلوکی کسی صورت برداشت نہیں کی جائے گی۔ انہوں نے مزید کہا کہ سرکاری دفاتر کا بنیادی مقصد عوام کی خدمت اور انہیں سہولیات کی فراہمی ہے، لہٰذا تمام افسران اور اہلکار اپنی کارکردگی کو بہتر بناتے ہوئے ترقی کے اہداف کے حصول کے لیے مؤثر اقدامات کریں۔