پاکستان اور آئی ایم ایف کے درمیان اسٹاف لیول معاہدہ طے پاگیا

عالمی مالیاتی فنڈ (آئی ایم ایف) اور پاکستان کے درمیان اسٹاف لیول معاہدہ طے پا گیا ہے، جس کے بعد ملک کے لیے اہم مالی معاونت کی راہ ہموار ہو گئی ہے۔

آئی ایم ایف کے مطابق ایگزیکٹو بورڈ کی منظوری کے بعد پاکستان کو توسیعی فنڈ سہولت (EFF) کے تحت ایک ارب ڈالر جبکہ ریزیلینس اینڈ سسٹین ایبلٹی فیسلٹی (RSF) کے تحت 21 کروڑ ڈالر تک رسائی حاصل ہوگی۔

ادارے کا کہنا ہے کہ دونوں پروگرامز کے تحت مجموعی ادائیگیاں تقریباً 4.5 ارب ڈالر تک پہنچ جائیں گی، تاہم حتمی منظوری کے بعد ہی رقم جاری کی جائے گی۔

آئی ایم ایف نے مزید کہا کہ حکومت پاکستان مالی خسارہ کم کرنے کے لیے پُرعزم ہے، مہنگائی کو قابو میں لانے کے اقدامات جاری ہیں جبکہ ٹیکس نظام میں اصلاحات کے باعث معیشت بتدریج بہتری کی جانب گامزن ہے۔