مراعات پر پابندی؛ حکومت نے سرکاری ملازمین کے الاؤنسز اور دیگر ادائیگیاں روک دیں

حکومت نے مالیاتی دباؤ اور مراعات میں کمی کی پالیسی کے تحت سرکاری ملازمین کے الاؤنسز اور دیگر ادائیگیوں کو عارضی طور پر روک دیا ہے۔

ذرائع کے مطابق حکومتی ہدایات پر اے جی پی آر نے تنخواہوں کے علاوہ ہر قسم کی اضافی ادائیگی تاحکم ثانی معطل کر دی ہے، جبکہ اس وقت صرف بنیادی تنخواہوں کی ادائیگی کا عمل جاری رکھا گیا ہے۔

ذرائع کا کہنا ہے کہ یہ فیصلہ International Monetary Fund کے ساتھ جاری مذاکرات کے تناظر میں کیا گیا ہے، تاکہ مالیاتی اہداف کو ہر صورت پورا کیا جا سکے۔

حکومت کی جانب سے مقررہ مالیاتی بینچ مارکس حاصل کرنے کے لیے اخراجات میں کمی لانے کی کوشش کی جا رہی ہے، جس کے باعث دیگر تمام ادائیگیاں فی الحال روک دی گئی ہیں۔