وزیر اعظم کی عام آدمی کو ہاؤس فنانس کی سہولت پہنچانے کے حوالےسے عملی اقدامات اٹھانے کی ہدایت

وزیراعظم شہباز شریف کی زیر صدارت وفاقی وزارت ہاؤسنگ اینڈ ورکس کے امور پر اجلاس آج وزیراعظم ہاؤس میں منعقد ہوا، جس میں کم آمدنی والے طبقے کے لیے رہائش، سستے گھروں کے منصوبے اور عوامی سہولیات کی بہتری پر غور کیا گیا۔

وزیراعظم نے ہدایت کی کہ عام آدمی تک ہاؤس فنانس کی سہولت مؤثر انداز میں پہنچائی جائے اور عملی اقدامات جلد شروع کیے جائیں۔ اجلاس میں وزارت ہاؤسنگ اینڈ ورکس کے اسٹریٹجک روڈ میپ پر بریفنگ دی گئی اور تعمیراتی شعبے کے ٹیکس اسٹرکچر میں اصلاحات، ہاؤس مورٹگیج اصلاحات، اور پبلک پرائیویٹ پارٹنرشپ کے تحت کم آمدنی والے افراد کے لیے گھروں کی تعمیر کے منصوبے پر تفصیل سے بات کی گئی۔

اجلاس میں ریئل اسٹیٹ اور ہاؤسنگ کے ضابطہ کار کے لیے ریئل اسٹیٹ ریگولیٹری اتھارٹی کے قیام اور رئیل اسٹیٹ انویسٹمنٹ ٹرسٹ کے ذریعے ہاؤس فنانس کے مسائل حل کرنے کے لیے وزارت خزانہ، ایف بی آر، سیکیورٹیز اینڈ ایکسچینج کمیشن اور صوبائی وزارت ہاؤسنگ کے ساتھ تعاون پر بھی غور کیا گیا۔

اجلاس میں وفاقی وزراء، مشیران اور متعلقہ اعلیٰ سرکاری افسران نے شرکت کی، جن میں وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر خزانہ محمد اورنگزیب، وفاقی وزیر ہاؤسنگ ریاض پیرزادہ، وفاقی وزیر انفارمیشن ٹیکنالوجی شزا فاطمہ، اور وزیر مملکت برائے خزانہ و ریلوے بلال اظہر کیانی شامل تھے۔