میر ضیاء اللہ لانگو عوام دوست اور باصلاحیت رہنما ہیں، فرح شاہ

میر ضیاء اللہ لانگو کو وزیر داخلہ بلوچستان کا منصب سنبھالنے پر فرح عظیم شاہ نے دلی مبارکباد پیش کی ہے۔

بلوچستان عوامی پارٹی کے صوبائی خواتین ونگ کی صدر اور رکن صوبائی اسمبلی فرح عظیم شاہ نے اپنے بیان میں کہا کہ میر ضیاء اللہ لانگو کی شاندار کارکردگی، عوامی خدمت کا جذبہ اور بہترین قیادت کی صلاحیتیں انہیں ایک قابل، بااعتماد اور باصلاحیت رہنما بناتی ہیں۔ انہوں نے ہمیشہ عوامی مسائل کو سنجیدگی سے لیا اور ان کے حل کے لیے عملی اقدامات کیے، جو ان کی مخلصانہ قیادت کا ثبوت ہے۔

انہوں نے کہا کہ بطور وزیر داخلہ ان سے توقع ہے کہ وہ صوبے میں امن و امان کو مزید مستحکم کریں گے، عوام کے جان و مال کا تحفظ یقینی بنائیں گے اور قانون کی بالادستی کو برقرار رکھیں گے۔

فرح عظیم شاہ کا کہنا تھا کہ میر ضیاء اللہ لانگو کی قیادت میں بلوچستان میں ترقی، استحکام اور خوشحالی کے نئے دور کا آغاز ہوگا اور عوام کو ایک محفوظ اور پُرامن ماحول میسر آئے گا۔ انہوں نے ان کی سابقہ خدمات کو بھی خراجِ تحسین پیش کرتے ہوئے کہا کہ ان کی محنت، لگن اور عوامی خدمت کا جذبہ قابلِ ستائش ہے۔

آخر میں انہوں نے دعا کی کہ اللہ تعالیٰ میر ضیاء اللہ لانگو کو اپنے فرائض احسن طریقے سے ادا کرنے اور عوام کی امیدوں پر پورا اترنے کی توفیق عطا فرمائے۔ آمین۔