اسرائیلی حملے میں ایرانی فوج کے بریگیڈیئر جنرل عبداللہ جلالی شہید

تہران: اسرائیل کے حملوں کے دوران ایران کی فوج کے ایک اور اعلیٰ کمانڈر بریگیڈیئر جنرل عبداللہ جلالی شہید ہو گئے۔

ایرانی فوج کی جانب سے جاری بیان میں تصدیق کی گئی ہے کہ اسرائیلی حملے میں بریگیڈیئر جنرل عبداللہ جلالی شہید ہوئے۔ حکام کے مطابق وہ دشمن کے حملے کے وقت دفاعی کارروائیوں کی قیادت کر رہے تھے اور وطن کے دفاع کے دوران جامِ شہادت نوش کیا۔

ایرانی حکام کا کہنا ہے کہ جنگ کے آغاز کے بعد اب تک کئی اعلیٰ فوجی کمانڈرز اور سیکیورٹی افسران شہید ہو چکے ہیں، جن کی باقاعدہ تصدیق بھی کی جا چکی ہے۔

ادھر پاسداران انقلاب نے اعلان کیا ہے کہ امریکی فوجی اڈوں کے خلاف حملوں کی ایک نئی لہر شروع کر دی گئی ہے۔ ان کارروائیوں میں متحدہ عرب امارات میں قائم امریکی اڈوں کے علاوہ بحرین، کویت اور اردن میں موجود امریکی بیسز کو بھی نشانہ بنایا گیا جبکہ خطے میں ریڈار سسٹمز پر بھی حملے کیے گئے۔

ایرانی حکام نے واضح کیا ہے کہ فوجی کمانڈروں کی شہادت کے باوجود دشمن کے خلاف مزاحمت جاری رکھی جائے گی اور ملکی دفاع میں کوئی کمی نہیں آنے دی جائے گی۔