انٹرنیشنل اہم خبر

ایران جنگ میں امریکی فوج کو بھاری نقصان، تقریباً 150 اہلکار زخمی ہونے کا انکشاف

March 11, 2026 bilal@zakirali.co انٹرنیشنل, اہم خبر

ایران کے ساتھ جاری 10 روزہ جنگ کے دوران امریکی فوج کے تقریباً 150 اہلکاروں کے زخمی ہونے کا انکشاف سامنے آیا ہے۔ خبر رساں ایجنسی کے مطابق اس معاملے سے باخبر دو ذرائع نے بتایا ہے کہ جنگ کے دوران امریکا کو قابلِ ذکر جانی نقصان اٹھانا پڑا ہے۔

رپورٹ کے مطابق اس سے قبل امریکی محکمہ دفاع (پینٹاگون) کی جانب سے صرف 8 امریکی اہلکاروں کے شدید زخمی ہونے کی تصدیق کی گئی تھی۔ تاہم تازہ رپورٹ سامنے آنے کے بعد پینٹاگون نے وضاحت کرتے ہوئے کہا کہ جنگ کے آغاز سے اب تک تقریباً 140 امریکی فوجی زخمی ہو چکے ہیں۔

پینٹاگون کے چیف ترجمان شان پارنیل کے مطابق آپریشن ایپک فیوری کے آغاز سے اب تک مسلسل حملوں کے دوران 6 امریکی فوجی ہلاک ہوئے جبکہ متعدد سروس ممبرز زخمی بھی ہوئے۔ ان کا کہنا تھا کہ زخمی ہونے والے 108 اہلکار علاج کے بعد دوبارہ ڈیوٹی پر واپس آ چکے ہیں۔

ترجمان کے مطابق شدید زخمی ہونے والے 8 فوجیوں کو اعلیٰ طبی سہولیات فراہم کی جا رہی ہیں جبکہ زیادہ تر زخمیوں کی حالت معمولی نوعیت کی ہے۔

خبر رساں ایجنسی کے مطابق زخمیوں کی نوعیت سے متعلق مکمل تفصیلات سامنے نہیں آ سکیں، تاہم ماہرین کے مطابق دھماکوں کے نتیجے میں دماغی چوٹیں ایسے حملوں میں عام ہوتی ہیں۔