نوشکی: گرلز ڈگری کالج میں مسلح نقاب پوش افراد کی فائرنگ، تین طالبات زخمی

نوشکی: نوشکی کے گرلز ڈگری کالج میں تین مسلح نقاب پوش افراد کے داخل ہونے اور طالبات پر فائرنگ کے نتیجے میں تین طالبات زخمی ہوگئیں۔

پولیس ذرائع کے مطابق مسلح افراد نے کالج میں داخل ہوکر مبینہ طور پر سی سی ٹی وی کیمروں اور پرنسپل کے دفتر میں توڑ پھوڑ کی، جس کے بعد طالبات پر فائرنگ کردی۔ فائرنگ کے نتیجے میں مہمونہ، مریم اور رخسانہ زخمی ہوئیں۔

پولیس ذرائع کا کہنا ہے کہ زخمی طالبات کا تعلق قاضی آباد اور کلی مینگل سے ہے۔ تینوں زخمیوں کو میر گل خان نصیر ٹیچنگ ہسپتال منتقل کردیا گیا، جہاں ایک طالبہ کی حالت تشویشناک بتائی جارہی ہے۔

واقعے کے محرکات اور ملزمان سے متعلق مزید تفصیلات تاحال سامنے نہیں آسکیں۔