پاکستان اور آئی ایم ایف کے درمیان اقتصادی جائزے سے متعلق مذاکرات رواں ہفتے شروع ہونے کا امکان

اسلام آباد: پاکستان اور بین الاقوامی مالیاتی فنڈ (آئی ایم ایف) کے درمیان اقتصادی جائزے سے متعلق مذاکرات رواں ہفتے شروع ہونے کا امکان ہے۔

ایکسٹنڈڈ فنڈ فسیلٹی (ای ایف ایف) پروگرام کے تحت پانچویں قسط کے حصول کے لیے مذاکرات تقریباً دو ہفتے جاری رہیں گے۔ مذاکرات کے دوران آئی ایم ایف حکام کو جون تک کی معاشی سرگرمیوں اور ملکی معیشت کی صورتحال پر بریفنگ دی جائے گی۔

ذرائع کے مطابق پاکستان اور آئی ایم ایف کے درمیان معاشی اصلاحات اور اسٹرکچرل بینچ مارکس کے تحت مقررہ اہداف پر بھی بات چیت ہوگی، جبکہ توانائی کے شعبے میں اصلاحات اور بجلی و گیس کے سرکلر ڈیٹ سے متعلق اہداف بھی مذاکرات کا حصہ ہوں گے۔

مذاکرات کامیاب ہونے کی صورت میں پاکستان کو مجموعی طور پر 1.2 ارب ڈالر تک کی رقم ملنے کا امکان ہے، جس میں ای ایف ایف کے تحت تقریباً ایک ارب ڈالر جبکہ موسمیاتی تبدیلیوں سے نمٹنے کے لیے 20 کروڑ ڈالر شامل ہیں۔

پاکستان نے 37 ماہ پر مشتمل آئی ایم ایف پروگرام ستمبر 2024 میں حاصل کیا تھا، جس کے تحت اب تک تین اقساط موصول ہوچکی ہیں۔