پی ٹی آئی کو کسی صورت اسلام آباد میں امن خراب کرنے کی اجازت نہیں دیں گے، عطا تارڑ

اسلام آباد: وفاقی وزیر اطلاعات عطا تارڑ نے کہا ہے کہ حکومت پی ٹی آئی کو اسلام آباد آکر امن و امان کی صورتحال خراب کرنے کی اجازت نہیں دے گی اور قانون کی عمل داری ہر صورت یقینی بنائی جائے گی۔

نجی ٹی وی سے گفتگو کرتے ہوئے عطا تارڑ نے کہا کہ حکومت اسلام آباد میں امن و امان برقرار رکھنے کے لیے بھرپور اقدامات کرے گی۔ ان کا کہنا تھا کہ پی ٹی آئی نے آج تک پرامن احتجاج کا طرزِ عمل نہیں اپنایا، اس لیے پارٹی کو اپنے رویے پر غور کرنا چاہیے۔

وفاقی وزیر نے عمران خان کی بہنوں کی گرفتاری کے حوالے سے کہا کہ انہیں ایسی مصدقہ اطلاعات کی بنیاد پر گرفتار کیا گیا کہ وہ امن و امان کی صورتحال خراب کرسکتی ہیں۔

مذاکرات کے حوالے سے عطا تارڑ نے پی ٹی آئی کی قیادت اور فیصلہ سازی کے عمل پر سوالات اٹھاتے ہوئے کہا کہ حکومت کے لیے یہ واضح نہیں کہ مذاکرات کے لیے پارٹی میں کس سے بات کی جائے۔ انہوں نے بیرسٹر گوہر کے کردار پر بھی تنقید کی اور مذاکرات کی افادیت پر تحفظات کا اظہار کیا۔