عوامی شکایات کے حل میں تاخیر قبول نہیں، کمشنر لورالائی ڈویژن ولی محمد بڑیچ

لورالائی(میاں محمدعامربشیر آرائیں) ضلعی انتظامیہ لورالائی کے زیرِ اہتمام میختر میں کھلی کچہری کا انعقاد کیا گیا، جس میں کمشنر لورالائی ڈویژن ولی محمد بڑیچ نے بطور مہمانِ خصوصی شرکت کی۔ کھلی کچہری میں ڈپٹی کمشنر لورالائی کیپٹن ریٹائرڈ محمد حسیب شجاع، اسسٹنٹ کمشنر میختر ، مختلف سرکاری محکموں کے افسران، قبائلی عمائدین، سیاسی و سماجی شخصیات اور علاقہ مکینوں نے شرکت کی۔کھلی کچہری کے دوران میختر کے شہریوں نے براہِ راست اپنے مسائل اور مشکلات سے کمشنر، ڈپٹی کمشنر اور متعلقہ حکام کو آگاہ کیا۔ شہریوں کی جانب سے بالخصوص پینے کے صاف پانی کی فراہمی، تعلیم، صحت، بجلی، سڑکوں، صفائی ستھرائی، نکاسی آب، بلدیاتی سہولیات اور دیگر بنیادی مسائل پیش کیے گئے۔کمشنر ولی محمد بڑیچ نے شہریوں کی شکایات اور تجاویز کو تفصیل سے سنا اور متعلقہ محکموں کے افسران کو موقع پر ضروری ہدایات جاری کیں۔ انہوں نے کہا کہ عوامی شکایات کے حل میں غیر ضروری تاخیر کسی صورت قابل قبول نہیں، تمام محکمے اپنے دائرہ اختیار میں آنے والے مسائل پر فوری کارروائی کرتے ہوئے عملی اقدامات یقینی بنائیں۔ڈپٹی کمشنر کیپٹن ریٹائرڈ محمد حسیب شجاع نے بھی متعلقہ افسران کو ہدایت کی کہ کھلی کچہری میں پیش کیے جانے والے مسائل کو ترجیحی بنیادوں پر حل کیا جائے اور جن معاملات کے لیے صوبائی یا متعلقہ اعلیٰ حکام سے رابطے کی ضرورت ہو، ان کے لیے بروقت سفارشات اور رپورٹس ارسال کی جائیں۔
اسسٹنٹ کمشنر میختر نے علاقے میں جاری ترقیاتی اور عوامی فلاحی امور سے متعلق حکام کو بریفنگ دی اور شہریوں کی جانب سے پیش کیے گئے مسائل کے حل کے لیے انتظامیہ کی جانب سے کیے جانے والے اقدامات سے آگاہ کیا۔کمشنر ولی محمد بڑیچ نے متعلقہ محکموں کو ہدایت کی کہ عوام کو بنیادی سہولیات کی فراہمی میں بہتری لانے کے ساتھ ساتھ سرکاری اداروں میں عوامی شکایات کے ازالے کے مؤثر نظام کو یقینی بنایا جائے۔ انہوں نے کہا کہ انتظامیہ اور عوام کے درمیان براہِ راست رابطہ مسائل کے حل میں اہم کردار ادا کرتا ہے، اس لیے کھلی کچہریوں کا سلسلہ جاری رکھا جائے گا۔
انہوں نے مزید کہا کہ دور دراز علاقوں کے عوام کو ان کی دہلیز پر سرکاری سہولیات کی فراہمی ضلعی انتظامیہ کی ترجیحات میں شامل ہے۔ متعلقہ افسران عوامی مسائل کے حل کے بعد ان پر ہونے والی پیش رفت سے انتظامیہ کو آگاہ کریں تاکہ شکایات کے مؤثر فالو اَپ کو یقینی بنایا جا سکے۔
علاقہ مکینوں نے کھلی کچہری کے انعقاد کو خوش آئند قرار دیتے ہوئے کہا کہ اس طرح کے اقدامات سے عوام کو اپنے مسائل براہِ راست اعلیٰ انتظامی افسران کے سامنے پیش کرنے کا موقع ملتا ہے۔ شہریوں نے امید ظاہر کی کہ کھلی کچہری میں پیش کیے گئے مسائل کے حل کے لیے جاری ہدایات پر عملی طور پر عملدرآمد بھی یقینی بنایا جائے گا