وزیراعظم ریلیف اسکیم، سستے پیٹرول کیلئے ڈیجیٹل نظام فعال

اسلام آباد: وزیراعظم کی خصوصی ریلیف اسکیم کے تحت موٹر سائیکل، رکشہ، چنگچی اور 800 سی سی تک کی گاڑیوں کے مالکان کو پیٹرول پر فی لیٹر 100 روپے ریلیف دینے کے لیے ڈیجیٹل نظام فعال کردیا گیا۔

وزارت آئی ٹی کے مطابق وزیراعظم کی ہدایت پر صوبائی محکموں، نادرا اور ٹیلی کام آپریٹرز کے تعاون سے ایک خودکار ڈیجیٹل نظام تیار کیا گیا ہے، جس کے ذریعے مستحق شہریوں کی تصدیق اور ریلیف کی فراہمی کا عمل شفاف بنایا جائے گا۔

اس اسکیم کا مقصد مہنگے پیٹرول کے باعث متاثر ہونے والے محنت کش اور کم آمدن والے طبقے کو ریلیف فراہم کرنا ہے۔ اسکیم کے تحت موٹر سائیکل اور چنگچی کے لیے ماہانہ 20 لیٹر جبکہ 800 سی سی تک کی گاڑیوں کے لیے ماہانہ 30 لیٹر پیٹرول پر فی لیٹر 100 روپے رعایت دی جائے گی۔

وزارت آئی ٹی کے مطابق صوبائی محکمہ ٹرانسپورٹ اور ایکسائز کے تعاون سے گاڑیوں کی تصدیق کا عمل بھی خودکار کردیا گیا ہے، جس سے مستحق افراد تک ریلیف کی فراہمی میں شفافیت کو یقینی بنانے میں مدد ملے گی۔